December 2, 2001

Hallo Almal,

Vandag is nou ‘n lekker reënerige dag hier by ons. Dit is Sondagmiddag, en ek wil nog ‘n briefie skryf voor Kersfees. My vorige brief het net tot Halloween gegaan wat in Oktober was. Nou moet ek eers verder vertel van November en Desember se doen en late.

In November was die groot Thanksgiving vakansiedae. Dit is die een keer in ‘n jaar wat ek ‘n GROOT kalkoen gaarmaak. Ek het vergeet om die kalkoen af te neem. Die skool maak ook ‘n groot storie daarvan, want dit gaan oor die pelgrims en indiane ens. Daar is ‘n hele geskiedenis agter Thanksgiving, maar ek gaan nie vandag daaroor vertel nie. Vir skool moes Wiekus en Christo Thanksgiving hemde maak. Hulle maak dit van kruidenierswinkels se inkopiesakke. Dit is bruin papiersakke wat mens moet sny in die vorm van ‘n hemp. Ek moes Wiekus s’n maak en uitsny en hy moes dit versier het. Hier is hy baie besig om dit te doen op die kombuis vloer. Ek het vergeet om ‘n foto te neem van hoe dit gelyk het toe dit klaar was….

Hier is nog ‘n foto van Wiekus wat huiswerk doen in die aand, en Christo wat op die rekenaar werk….my rekenaar natuurlik.

Ons is nog baie besig om te lees lees lees en nogmaals te lees. Huiswerk elke dag is om vir 15 minute te lees. Vandat ek by die huis is, is daar meer tyd om dit te doen, en ek het die kinders goed lusgemaak vir lees. Hierdie foto was vir my te oulik. Ek en Neels het TV gekyk en toe kom Wiekus en gaan sit op Neels se skoot. Daar het hy rustig gesit en ‘n storieboek deurgelees.

Hier is nog ‘n foto van die leesproses. Wiekus glo in die aande as hy gaan slaap, dan moet hy nog so ‘n paar bladsye van lees inkry. Christo het dit nie gemaak nie. Hy het halfpad aan die slaap geraak met sy boek nog in sy hande!

Vandat dit winter is maak ons ook elke week BILTONG….YUMMIES! Neels is die meester in biltong maak en hier het Wiekus baie mooi gevra of hy ook mag help. Ek dink hy het van die idée gehou om met die vleis te speel…..ag ek bedoel te sout! J Hy is altyd so gewillig om te help.

Met die week vakansie in November het ek en die kinders baie pret gehad by die huis. Die Maandag het ‘n vriendin van die kerk gevra of ek haar 2 kinders vir die dag kan oppas. Sy moes gaan werk het en haar man het ‘n belangrike vergadering gehad wat hy moes bywoon. Die dogter Kaylin is 7 jaar oud en die seuntjie Nolan is 5 jaar oud. Nadat die kinders gespeel, video’s gekyk het en verveeld begin raak het, het ons koekies gebak. Hulle het dit nou baie geniet….ek moet sê die versierde koekies het baie mooi gelyk, en die kinders het lekker geëet daaraan.

Die Dinsdag was ook ‘n reënerige dag gewees en ek het die kinders besig gehou met kryt, waspapier en ‘n skerpmaker. Ons het die vetkryt skerpgemaak en die saagsels op die waspapier gesit. Dit het hulle ‘n hele ruk besig gehou om verskillende kleure vetkryte skerp te maak. Daarna het ek dit met ‘n warm strykyster gesmelt. Nadat die papier weer koud geword het, het die kinders die papiere uitgeknip in vorms en dit opgesit teen die vensters. Dit het baie mooi gelyk.

Vrydagaand (30 November), het die kinders hulle belt promosie gehad vir hulle groen belde in karate. Die kinders doen nou al 9 maande karate en ons het besluit om hulle vir nog ‘n jaar in te skryf. Hulle het die toets geslaag en albei het nou groen belde in karate.

Nou vir ‘n bietjie Kersfeesnuus. Gister (Saterdag – 1 Desember) het ek en my Suid-Afrikaanse vriendin se ma kersfees koeke gebak. Linda werk nagdiens en sy moes slaap die dag. Haar kinders en ma kom kuier toe hier by my. Die kinders het natuurlik die hele dag gespeel en gespeel en gespeel…. Ek en die Tannie het toe die hele dag koek gebak en gebak en gebak. Dit was baie lekker gewees, want ek het nou geleer hoe om kersfeeskoek te bak….en is dit LEKKER! Ons het 4 koeke gebak en dit het 3 ure gevat om gaar te word, maar glo my, dis die moeite werd. Hier is ‘n foto van die koeke. Ons het nou al geproe daaraan en ek kan dit aanbeveel. Ons het natuurlik lekker gesoek na al die bestandele, want dit is nie Suid-Afrika hierdie nie! Linda-hulle was by 4 winkels gewees en ek was by 6 winkels gewees om al die bestandele te kry!

Kersfees is nou om die draai. Die week van Kersfees (22 Desember tot 29 Desember) gaan ons op vakansie na Oregon toe. Dit is die staat net bo California. Ek sal daarvan vertel as ons terug is…dit is natuurlik volgende jaar!

Ons wil vir almal ‘n BAIE GESEëNDE KERSFEES EN ‘N VOORSPOEDIGE NUWEJAAR TOEWENS.

Liefde Karina & gesin