July 27, 2003

Hallo,

Vandag wil ek nou eers vertel van ons vakansie by LegoLand, Seaworld en Wild Animal Kingdom Park in San Diego. Ek kan nie glo dat so baie tyd al verloop het vandat ons daar was nie! Dit was ‘n baie lekker vakansie gewees vir ons almal.

Ons het die 15de Junie gery na San Diego en die 22ste Junie terug gekom. In die week wat ons soontoe en terug gery het, het ons 1100 myl afgelê. Ons het ook by Johannesburg gestop…dit is ‘n baie klein dorpie op pad na San Diego. En net sodat julle ons almal glo, hier is ‘n foto van Neels en die kinders by die padteken. Die populasie is 300 en die hoogte bo see spieël is 3,510 voet.

Nou ja, ons het by die Welk Oord gebly in ‘n 2 slaapkamer eenheid. Met die jare het ek nou altyd vertel van al die RCI oorde waar ons bly, en ons was nie teleurgesteld nie. Die oord was pragtig en goed versorg. Die eenheid waar ons gebly het was netjies skoon en ons was naby ‘n verhitte swembad en Jacuzzi. Ons het elke dag gaan swem in die lekker warm swembad.

Die eerste dag het ons na Lego Land gegaan. Ons het ‘n tweedag kaartjie gehad vir hierdie park. Die eerste dag het ons die plek gaan verken en soveel gedoen as wat ons kon, die tweede dag wat ons teruggegaan het, het ons net al die lekker dinge gedoen. Alles by Lego Land is gebou van lego’s; dit is ongelooflik. Ons het eers ‘n bootrit gedoen met die “Coast Cruise” en oorals langs die kante was daar lego geboue, brue, olifante en figure. Hulle plak die Legos aanmekaar vas, sodat dit nie losgaan nie. Daar is letterlik miljoene & miljoene Legos. Die foto wat ek insit is van die bootrit en die seediere op die foto is alles van legos gebou.

Ons het ‘n kaart van die plek gehad en oorals langs die pad kan mens op roller coasters ry. Die park is ook meer gerig op kleiner kinders van so 3 – 6 jaar oud. Die beste vir my was die Miniland Models. Dit sê dat daar 16 miljoen lego blokkies aanmekaar geplak is. Dit het ‘n span modelbouers 3 jaar geneem om alles te bou. Dit sal een persoon 67 jaar neem om dit te bou. Hulle sê ook dat dit met dieselfde lego’s gebou word as wat mens in die winkels kry. Selfs die figure in die plek was alles met lego’s gebou, die mense, honde ens. Die plek is ook vol bonsai boompies. Nadat ons die miniland deurgestap het, het ons gaan ry op ‘n paar rollercoasters…of soortvan. Daar was ook ‘n “Driving School” vir kinders 8 – 12 jaar en Wiekus en Christo het dit baie geniet! Die area waar hulle gery het het regte robotte en stop strate gehad. Neels het ‘n foto van die twee geneem toe hulle toevallig saam was. Dit het darem vir my so lekker gelyk om die karretjies te bestuur, maar helaas, ouers mag nie ry nie.… bummer.

Daarna is ons na die “Sky Patrol” rit. Dit is ‘n helicopter rit vir kinders en ouers. Nogal lekker gewees, die kinders kon self kies om op of af te gaan. Ek en Christo is saam en Neels het saam met Wiekus gery. Nadat ons daar klaar was het ons met die “Skipper School” boot gaan ry. Dit kon die kinders ook self bestuur, en oorals langs die kante was daar weereens lego mannetjies en diere ens. Die kinders het dit geniet om die bote self te beheer en die petrol te trap!

Sjoe, twee bladsye van Lego Land, nou moet ek vertel van die volgende twee parke waar ons was. Dinsdag 17 Junie is ons na die “San Diego Wild Animal Park”. Dit was ‘n lekker warm sonskyndag en ek en die kiddies was reg vir baie wilde diere… met ons sonbrille en kameras! Ons het eers op die “Simba Station Railway” trein gery om die plek in geheel te sien. En heelaas, ons het ‘n deel van Suid-Afrika gesien. Neels het foto’s geneem daarvan, want die palmbome was vir ons snaaks. Miskien hou die SA diere van palmbome??! Die diere is ook so vêr op die foto’s, dat dit nie so goed in die brief lyk nie, daarom sit ek sommer ‘n algemene foto in van die plek. Ons het baie renosters en hulle babatjies gesien. Vreeslik cute! Ek dink ons het op ‘n goeie tyd gegaan, want daar was baie baba bokkies ook gewees. Die mooiste deel van die park vir my was die “Butterfly pavilion”. Ons het in ‘n gebou ingestap en daar was net vlinders, verskillende groottes en kleure. Hulle vlieg oorals om jou kop en kom sit op jou hare. Ongelooflik dat hulle die vlinders so gelukkig kan hou!

Die “Petting kraal” was ook ‘n groot sukses, dit is waar die kinders die wilde diere kan vryf. Altyd ‘n sukses!

Drie keer ‘n dag was daar ook ‘n olifant skou en ons het een bygewoon. Ongelooflik wat hulle alles vir ‘n olifant kan leer!

Nou ja, ek moet nou aanstap na ons laaste park en dit was Seaworld in San Diego. Ons was in 1998 ook by ‘n Seaworld in Florida gewees, so hierdie ene stem baie ooreen. Dit fasineer my altyd dat hulle ‘n park so indrukwekkend kan maak. Dit was beslis die lekkerste park om te besoek. Die opvoerings van die diere is baie goed, daar was dofyne, walvisse, seeleeus en honde, katte en ‘n vark wat toertjies doen. Dan het hulle ook visse soos “Stingray’s”, dolfyne en seeleeus wat mens kan voer. Natuurlik die lekkerste vir my! Die kos is net baie duur wat mens koop, maar so maak hulle geld! Een van die oulikste opvoerings wat ons gesien het was “Fools with Tools”, seeleeus toertjies..baie oulik. Nou ja ek moet groet….. Liefde Karina & gesin.